افتكر انت جيت هنا ليه ؟

في وسط زحمة المذاكرة وتأنيب الضمير، بننسى إحنا أصلاً بنعمل كل ده ليه، وبنتعامل مع ثانوية عامة على إنها "وحش" لازم ننتصر عليه أو مقبرة لأحلامنا.. بس الحقيقة أبسط وأجمل من كده.

إنت مش بتذاكر عشان مجرد "رقم" يتكتب في شهادة. ولا عشان تثبت حاجة لحد، ولا عشان خايف من نظرة الناس. إنت بتسعى عشان تبني نفسك، وعشان تكون جاهز للرسالة اللي ربنا مجهزهالك.

ربنا مش بيقيس قيمتك بمجموعك، ولا محتاج منك كذا في المية عشان يبارك حياتك. هو بس بيعلمك إزاي تكون "أمين في القليل"، وإزاي تسعى وتعمل اللي عليك. الكلية اللي هتدخلها في النهاية هي مجرد "المكان" اللي ربنا هيزرعك فيه عشان تخدم بيه اللي حواليك وتمجد اسمه بطريقتك.

<aside> ⚠️

عشان كده، افتكر دايماً:

</aside>

• إنت هنا عشان تتعلم السعي، النتيجة والتنسيق دي بتاعة ربنا وهو أدرى باللي هينفعك.
• إنت بتبني شخصية قوية قادرة تتحمل المسؤولية، مش مجرد مكنة بتحفظ مناهج وهتنساها.
• خلي مذاكرتك وتعبك ده تقدمة لربنا.. "وَكُلُّ مَا فَعَلْتُمْ فَافْعَلُوهُ مِنَ الْقَلْبِ، كَمَا لِلرَّبِّ لَيْسَ لِلنَّاسِ" (كولوسي 3: 23). لما تتعب بالنية دي، تأكد إن ربنا عمره ما هيضيع تعبك، وهيعوضك بسلام ونجاح يفوق تخيلك.

🗣️ الدوشة اللي في دماغك دلوقتي: (افتح السهم اللي بيعبر عن إحساسك دلوقتي)

• أنا قصرت وضيعت وقت كتير، وربنا عادل وأكيد هيعاقبني ومش هيساويني باللي طحن نفسه.
• لو التنسيق رماني في كلية ماليش فيها، مستقبلي كله هيتدمر وهبقى ولا حاجة.
• أنا جالي تبلد.. مبقتش حاسس بحاجة، ومبقتش فارقة معايا أجيب كام، أنا بس عايز أخلص.
• أنا بذاكر وأتعب، وصحابي بيذاكروا أقل وبيحلوا أحسن مني.. ليه الظلم ده؟
• "خايف أصلي وأطلب من ربنا حاجة وفي الآخر متتحققش وأتكسر.

رسالة من حد كان مكانك..

أنا بكتبلك الكلام ده وأنا دلوقتي في تالتة جامعة، يعني من ٣ سنين بالظبط كنت قاعد نفس قعدتك دي، وحاسس إن الحيطان بتتقفل عليا، وإن المنهج جبل مش راضي يخلص، وحاسس بـ (Panic) كل ما افتكر إن مستقبلي كله متعلّق بشوية ورق همتحن فيهم.

كنت بقوم من النوم مخنوق، وبنام وأنا قلبي واجعني عشان خايف أخذل أهلي أو أطلع 'فاشل' في نظر نفسي.. بس دلوقتي وأنا بكلمك، عايز أقولك إن كل ده كان 'كدب'.. الثانوية العامة دي 'فترة' مش 'حياة'.. هي مجرد كوبري ربنا بيعديك عليه عشان يوديك للمكان اللي هو مجهزهولك إنت بالذات.

صدقني، ربنا مش مستني منك 'رقم' عشان يحبك، ولا مكتب التنسيق هو اللي هيحدد إنت مين أو قيمتك إيه. أنا دخلت الكلية اللي ربنا اختارهالي، واكتشفت إن النجاح الحقيقي مش في اسم الكلية، النجاح هو إنك تكون أمين في السعي بتاعك، وتسيب النتيجة للي شايف الصورة كاملة.

لو حاسس إنك 'جبت آخرك'.. حقك. لو حاسس إنك عايز تسيب الكتب وتنام.. حقك. ربنا شايف كل سهرة، وكل مرة ضغطت فيها على أعصابك، ومش هيسيبك. هو مش 'إله حسابات' بيحاسب بالدرجة، هو 'أب' بيسند في السكة.

ارمي حملك النهاردة عليه، وصدق إن بكرة أحلى بكتير مما تتخيل.. هانت صدقني، ومسيرها تنتهي وهتفتكر الأيام دي وتضحك وإنت في المكان اللي ربنا مجهزه عشان يبهرك بيه."

وفيما اظنه لا يستجيب - مريم حلمي - كورال مارإفرام السرياني

https://youtu.be/5Y1L417fPCo?si=pM_BHDYBQftymkp1